حلمت بشخص أعرفه يسكن في دولة أخرى قال لي تعالي عندي لو جم يوم عقب سيري... قلت طيب ماعرف اييك بروحي جي! وهم بعد فشلة.. بنيه يايه حق شاب؟ قلت لا ماعليج أنتي تعالي وبس وبرتب لج كل شيء.. من جافني مترددة قال لي.. علشاني يا فلانة تعالي.. قلت أوك بحجز تذكرة وكل شيء وأنت عليك تحجز لي الفندق لأن خييير شر ماعرف فنادقكم ولا اضمن حتى أحجز أون لاين.. قال لي أوك.. وصج حجرت وكل شيء ومن وصلت عندهم في المطار.. مسك ايدي وقال تعالي معاي.. السواق برا.. قلت أنت منو وبدون ما أطالع.. قال أنا فلان امشي.. وقلبي شوي ويوقف من التوتر.. دشيت سيارة يا سودا أو بيضا ماذكر أي من هاللونين.. بس كان الوقت ليل.. يعني مثل تواقيت من عقب ٨ المساء جي..بطل لي الباب وقال لي حياج.. دشيت ويلست وتميت لااااااصقة بجامة الباب.. ومستحية بمكاني.. وشوي صدمني أنه يلس عدالي ولصق فيني وحط ايده علي على كتفي كأنه يلمني بذراعه اليسار وأما اليمين زخ يديني وضغط عليها.. وقال ياحي الله بشيخة البنات..وأنا أنفض بمكاني تميت أقوله بدون ما أرفع راسي وكنت مستحية.. خوز بعيد مو حلوة بحقي.. قال لي لا تحاتين لو قصدج علشان هاليهال اللي ورى ماعليج منهم يالسين يلعبون.. وكانوا ٣ مادري ولد وبنتين أو بنت وولدين.. قال لي طالعيني يافلانة طالعيني.. وأنا خلاص بمووت بمكاني من الخوف.. قال لي خايفة مني يافلانة؟ رفع راسي بإيده اليمين وقال طالعيني.. ومن رفعت عيني أطالعه.. قلت لك لا هذا مو أنت يافلان.. هذا مو أنت.. قال لي شو؟ قلت هذا مو أنتتت.. ابتسم وفجأة وصلنا لبيت قال لي يالله أنزلي.. حياج.. قلت له على وين؟ قال هذا بيتي.. طالعته وقلت له حشششششششششى علي ما طبيت بيتك.. خذني لفندق.. يلس بجنبي أكثر وكتفه عند كتفي وغمضت عيني بسرررعة.. قال لي مادمتي جبانة ومو قد تصارخي بويهي لا تقولي شيء يخليني أزعل منج.. أنا مستحيل أضرج بشيء وهم بعد أمي داخل..ولا أرضى لج بالغلط قلت لا مابا مستحيل.. طلع من السيارة.. واتجه صوبي وبطل الباب وقال يالله.. وعقب مدة نزلت.. وتميت واقفة عند باب الشارع مو طايعة أدش.. ظهرت لي حرمة طويلة جسمها وسط لا ضعيفة ولا متينة وشعرها لونه بني أو بندقي.. قالت تعالي تعالي فلان قال زميلته بالشغل يايه من سفر.. تعالي حياج.. من جفت حرمة.. دشيت بيتهم.. وهالشخص قال لي بخلص شغلة وبردلج والبيت بيتج.. وعقب دشيت ويلست بغرفة بروحي والحرمة تركتني وسارت.. وعقب مدة.. كتبت بورقة سامحني يافلان بس أنا خايفة وبرجع لبيتنا.. وصج طلعت وأحس أني ضعت ماعرفت أدل المطار ودشيت مكان تقول مثل محمية الحيوانات البحرية.. كنت امشي وأجوفهم ..يعني كل ما امشي يكون في ماي وهم داخل هالماي ويبون عند ريولي يطالعوني.. واشكالهم حلووووة وغريبة..مثل الأخطبوط وقنديل البحر بشكلللل حلوو وألوان شفافة وتينن وكانوا أليفين ..بس يدورون حول ريولي لين جفت حرمة قالت انتبهي لا تدوسين عليهم اطلعي من هني.. وطلعت.. ويالله لين وصلت المطار جفت ربيعتي بالصدفة قلت لها احجزي لي تذكرة مايبت معاي بيزات ادفعي ومن أوصل البيت بحولج المبلغ ع طول.. قالت أوك.. ومن سارت.. إلا أجوف حد يزخ ايدي.. لفيت براسي إلا أجوف هالشخص نفسه .. قلت فلان؟؟.. كيف ييت بسرعة؟ طالعني وابتسم وقال بكل طمأنينة مافي سفر يالله تعالي معاي.. ونشيت