اللي صار ان والدتي طاحت وصار عندها كسر في الحوض ودخلت المستشفى واجروا لها عملية وكانت بفترة كورونا كانت الزيارات محدودة ولازم ع فترات بعدها صارت صحتها زينه وطلعت الحمدلله ورجعت البيت لكن حالتها فجأة بدأت تسوء في كل زيارة امر عليها اشوفها اتعب عن المرة اللي قبلها بحكم اني بعيدة عنهم منطقتي ابعد عن اهلي فما كنت اقدر ازورهم ماكانت عندي سيارة عشان اروح لهم في اي وقت ابغيه كنت امشي على وجود زوجي اللي دوامه صعب ولا يقدر ياخذ اجازه وفي يوم امي تعبت لان كان عندها سوء تغذيه يعني بعد هذي الطيحة صارت شوي احسن وبعدها تغير حالها وكانت ترفض الاكل وصارت جلد على عظم فدخلت المستشفى وترقدت وانا اولادي انصابوا بكورونا ولا قدرت ازورها كنت محطية في قلبي ان هذي امانة مايصير ازورها وانا عندي اولاد مصابين لكن الكلام كان يجي من تحت لتحت ان مقصره مع امي وانا ابدا مو تفكيري هالشي هذي جنتي كيف اعرف ان امي مريضه ومااروح لها للتوضيح علاقتي طيبة مع اخواني الشباب واخواتي لكن اخواتي فيهم طبع اللي جانا عرف اخبارنا واللي مايسأل ماله حق ان نخبره بعلومنا مع اني كنت متواصله بالتلفون واسأل بشكل يومي لكن مع ذلك مااعرف ولا شي منهم وكله يقولوا امنا بخير المهم في هذي الفترة حلمت ان امي جاتني بالحلم وكان بنفس الحلم اصوات اخواني وأخواتي تتعالى شوي شوي وكان في موضوع يتشادو فيه بس ماكنت اعرف بالضبط بعدها دخلت عندي امي غرفة نومي وانا كنت شبه صاحية وكانت عندي بنتي صغيرة عمرها سنتين وفي طرف الغرفة ابوي كان موجود يطالع لما امي دخلت عندي عطتني طفلة رضيعة وقالت امسكي هذي اختك ووصتني انتبه عليها وقالت انا بأروح المستشفى وبعدها طلعت وكان ابوي يطالعني قلتله ماتبغي تمسك اختي قال لا انا تعبان راسي يعورني من ريحة الصبغ اللي في بيتك وانا ماكان عندي صبغ ولا شي وانتهى الحلم اللي خفت افسره يطلع شي يعور قلبي وبعد بأسبوع صار ان امي انعدت من احد اللي يزوروها بكورونا ودخلت الحجر كانت غرفة معزولة عن الكل محد يقدر يزورها كنت اعرف اخبارها من زوجة اخوي ونفس الشي يوم اسأل خواتي يقولو بخير دايم يقولو انها بخير ومرة قلت ان ابغي ازورها قالوا ماراح يدخلوني ممنوع كنت دايم اطلع من بيت ابوي وانا زعلانه لكن ماابين لهم وايد صارت مشاكل مع اخواني وخواتي لكن انا مع نفسي اسمع كلامهم ولو تكلمت محد اخذ برأيي امي كانت حالتها تسوء واخواني كانوا يبغوا ينقلوها مستشفى ثاني بس اخواتي يتحججوا ان هنا اقرب ومافينا نروح بعيد حتى اقنعوا ابوي ان لا توافق بالنقل صارت علاقتنا ببعض مهزوزه الكل يعتب والكل يخبي طلع في امي وايد اشياء وكانت تعبانه من سوء المعامله كانت تقولهم انا تعبانه ودوني المستشفى بطني يعورني يقولو مافيها شي تدلع حرام انا كم مرة شفت هالموقف تقول يوم اشتكي لهم بطني يعورني يقولو ان مافيني شي وانتي تدلعي واذا رحنا المستشفى بيعاقبونا حقوق كبار السن وكم مرة كلمتهم ان هي مريضه اي حقوق اللي بيعاقبوكم انتو ماحبستوها ومنعتو عنها الاكل انتو رجعتوها المستشفى لانها تعبانه هي ماقادرة تاكل لكن لا حياة لمن تنادي امي اللحين عند الله الله يرحمها ويغفر لها يارب توفت في شهر سبعه انتكست حالتها وكان كله بسبب الاهمال لا اعتراض على حكم الله لكن حتى الدكاترة والإدارة كانوا عارفين الانقسام اللي صار بين الاخوة حد يبغي ينقل وحد مش موافق ومن البداية كانوا قايلين لهم امكانية المستشفى محدودة لكن الله كريم بعد وفاتها بشهرين صار خلاف على ذهب امي والورث وفي يوم انا حلمت فيها وكان في مكان نفس البيت بس مش بيت ابوي كان مكان هادي وكانت تمشي معاي وتكلمني وتضحك معاي والله اتذكر هذا الحلم كان جميل كأنه حقيقه وقالت لي لاتروحي عني اقعدي معاي وكنت اقعد معاها وتكلمني انها فرحانه وبتتزوج انا كنت مستغربه كيف تتزوج وابوي هو زوجها قالت حتى ابوي بيتزوج وكلما كانت تسمع صوت ابوي واخواني تقول ماابغيهم يشوفوني انا ماابغي اشوفهم آسفة على الإطالة لكن اتمنى اذا في تفسير للحلم الاول والحلم الثاني